Ticker

6/recent/ticker-posts

Header Ads Widget

धुलीवंदनाच्या दिवशी गाढवावरून जावयाचे स्वागत...


१५० वर घरजावई येथे आहेत
आँनलाईन न्यूज नेटवर्क
नगर रिपोर्टर
बीड :  धुलीवंदनाच्या दिवशी जावयाचे स्वागत अथवा मानसन्मान देण्याची बीड येथील एका गावात आगळीवेगळी संस्कृती पाहण्यास मिळते. या दिवसाची अनेक जण उत्सुकतेने वाट पाहत असतात. या दिवशी जावयास चक्क गाढवावर बसवून गावभर मिरवूण आणले जाते. ही अनोखी परंपरा जहागीरदार आनंदराव देशमुख यांनी सुरु केल्याचे त्यांचे वंशज सांगतात.
साडेसात हजार लोकसंख्या असलेल्या विडा गावात 150 घरजावई कायम स्वरुपी वास्तव्यास आहेत. धुलिवंदनाच्या दोन दिवस आधी जावई शोधण्याची मोहीम गावकरी हाती घेतात. बरेच जावई गावकऱ्यांच्या सापळ्यातून निसटूनही जातात. कोणता जावई कुठे आहे, याचा शोध करण्यासाठी गावात पथके असतात. धुलिवंदनाच्या दिवशी त्या जावयाला पकडून गाढवावर बसवण्याची तयारी करण्यात येते.
यंदा मात्र अनेक तरुण जावयांनी पोबारा केल्याने गावातील ज्येष्ठ जावई दत्तात्रय गायकवाड यांची गाढवावर बसण्याकरता वर्णी लागली. जावयाची मिरवणूक संपूण गावातून वाजतगाजत काढण्यात आली. मारुतीच्या मंदिराजवळ येऊन या जावयाला नवीन कपड्याचा आहेर देण्यात आला. विशेष म्हणजे गाढवावर बसवलेल्या जावयाला दुसऱ्यांदा बसवण्यात येत नाही. ज्या जावयाला गाढवावर बसायचा मान मिळतो तो देखील मोठ्या उत्साहात गाढवावर बसतो हे विशेषच.
एखाद्या जावयाला गाढवावर बसवले जाते आणि रंगपंचमी साजरी केली जाते हा अनोखा उत्सव पाहण्यासाठी परजिल्ह्यातूनही नागरिक या गावात येतात. यंदाही शेकडो लोक विडा गावात आले आणि या उत्सवात सहभागी घेऊन रंगपंचमीचा आनंद लुटला.
थट्टा मस्करीत सुरु झालेली ही प्रथा आता या गावची संस्कृती बनली आहे. तशी या गावात घर जावयांची संख्या मोठी आहे. साडेसात हजार लोकसंख्या असलेल्या या गावात दीडशेपेक्षा जास्त घरजावई आहेत. मात्र हेच घरजावई धुळवड आली की गाव सोडून जातात. शेवटी काहीही झाले तरी गावकरी मात्र कोणाला तरी पडकून अखेर गाढवावर बसवतातच, आणि ही अनोखी परंपरा दरवर्षी मोठ्या उत्साहाने साजरी करतात.

Post a Comment

0 Comments